Прэс-рэлізы за 2008 год

Скарачэнне колькасці супрацоўнікаў амбасады ЗША ў Мінску

Заява прэс-сакратара Дзярждэпартамента ЗША Шона Маккормака

24 сакавіка 2008 года

Злучаныя Штаты з вялікім шкадаваннем амаль напалову скарачаюць колькасць амерыканскіх супрацоўнікаў сваёй амбасады ў Мінску згодна з патрабаваннем урада Беларусі. Апрацоўка візавых заяў тэрмінова прыпыненая. Мы працягваем аказваць паслугі амерыканскім грамадзянам у Беларусі.

Мы таксама шкадуем аб закрыцці беларускім рэжымам некалькіх “амерыканскіх куткоў”.  Гэтыя інфармацыйныя рэсурсы, што знаходзяцца ў мясцовых бібліятэках, забяспечваюць доступ да аб’ектыўнай інфармацыі пра ЗША праз калекцыі кніг і інтэрнет. Злучаныя Штаты высока цэняць прамыя кантакты паміж беларусамі і амерыканцамі і па-ранейшаму вітаюць наведванне ЗША беларускімі грамадзянамі.

Дзеянні ўладаў Беларусі заслугоўваюць шкадавання і дэманструюць, што афіцыйны Мінск пайшоў па шляху канфрантацыі і ізаляцыі замест супрацоўніцтва і дэмакратычных рэформ. Мы хацелі б бачыць іншыя адносіны з Беларуссю, аднак гэта магчыма толькі пасля таго, як урад Беларусі прадэманструе сваю павагу да правоў чалавека і асноўных свабод.