Прэс-рэлізы за 2009 год

Лагойская бальніца атрымала амерыканскія медыкаменты

Прэс-рэліз амбасады ЗША
24 лютага 2009 г.

Галоўны ўрач Іван Семяненкаў паказвае Джонатану Муру будынак лагойскай бальніцы

24 лютага 2009 года Часовы павераны ў справах ЗША ў Рэспубліцы Беларусь Джонатан Мур наведаў Лагойск, каб перадаць лагойскай цэнтральнай раённай бальніцы гуманітарную дапамогу ад прыватных амерыканскіх кампаній “Sydis Cadila” і “Gilead Sciences”. Медыкаменты з’яўляюцца часткай гуманітарнага груза коштам 4 982 000 долараў ЗША, які размяркоўваецца паміж медыцынскімі ўстановамі Беларусі. Гэтыя прэпараты дазволяць аказваць дапамогу 3400 пацыентам на працягу больш чым дзевяці месяцаў. Дзяржаўны дэпартамент ЗША забяспечыў дастаўку дапамогі і ўзяў на сябе адміністратыўныя выдаткі праекта, які каардынаваўся амерыканскай дабрачыннай арганізацыяй “CitiHope International”  і беларускай грамадскай арганізацыяй “Надежда экспресс” сумесна з Міністэрствам аховы здароўя Рэспублікі Беларусь. Падчас візіту Джонатан Мур узяў удзел у цырымоніі перадачы гуманітарнай дапамогі, сустрэўся з медыцынскімі супрацоўнікамі і прадстаўнікамі мясцовых уладаў і азнаёміўся з аснашчэннем лагойскай бальніцы.  Раней, 12 снежня 2008 года,  Джонатан Мур наведаў з візітам Полацк, дзе таксама перадаў мясцоваму анкалагічнаму дыспансеру амерыканскія медыцынскія прэпараты.
З 1991 года Злучаныя Штаты прадаставілі народу Беларусі гуманітарную дапамогу на суму больш за 270 мільёнаў долараў.